Piltsamaa

Piltsamaa
Põltsamaa

Lidnanznam	Flag
Valdkund	Estinma
Eläjiden lugu (2024)	4,106 ristitud
Pind	5,99 km²
Telefonkod	+372-xxx-xxxx
Aigvö	tal'vel UTC+2, kezal UTC+3

Lidnan kart (2012)

Piltsamaa (est.: Põltsamaa) om Estinman lidn valdkundan keskuzpalas. Mülüb Jigevan makundha, sen kahtenz' surtte lidn koumespäi, Piltsamaan volostin keskuz.

Istorii

Eländpunkt mainitase dokumentoiš ezmäižen kerdan vl 1234. Edel 1917. vot lidnan oficialine nimituz oli Oberpalen (saks.: Oberpahlen). Se oli marionetižen Livonijan kunigahusen (1570−1578) pälidnaks Livonijan sodan aigan, kunigahuz oli alištunu Ivan Grazii-carin tobmudele. Žilo sai lidnan statusad vn 1926 30. päiväl kezakud. Vll 1950−1962 lidn oli Piltsamaan rajonan keskuseks. Kadoti municipalitetan statusad vn 2017 reforman jäl'ghe.

Piltsamaa šingotase sömtegimištol (konservtegimed — frukt- da marjsüdäiveded, vinad, maploduiden konservad i painatosed), metallan ümbriradmižel eksportha, kompjuterprogramiden biznesan täht edheotandal, kleidüd pun pästandal iknoiden i uksiden täht, torguindal i turizmal.

Geografijan andmused

Lidnan sijaduz makundas i valdkundas vn 2009 kartal

Lidn sijadase makundan päivlaskmas, ühtennimižen jogen randal (est.: Põltsamaa jõgi 135 km pitte, Emajogen hurapol'ne bassein), 56..63 m ü.m.t. korktusil.

Matkad Tallidnhasai om 112 km lodeheze orhal vai 127 km avtotel, Tartuhusai om 53 km suvipäivnouzmha orhal vai 60 km avtotedme. Lähembaine lidn om makundan Jigev-keskuz (raudtestancijanke) kaks'kümnes ühesas kilometras päivnouzmha-pohjoižpäivnouzmha avtotedme. «Tallidn — Tartu»-mante om lidnan pohjoižröunaks.

Tobmuz

Kaik koume žilod da 58 küläd alištudas Piltsamaan volostin (est.: Põltsamaa vald) tobmudele vn 2017 redukun 24. päiväspäi. Volostin pind — 890 km².

Edeline lidnan pämez' om Jaan Aiaots, radoi vspäi 2003.

Eläjad

Vn 2011 Estinman rahvahanlugemižen mödhe lidnan eläjiden lugu oli 4,188 ristitud, vn 2021 — 4,150 ristitud. Kaikiš suremb lidnan ristitišt oli 5,261 eläjad vl 1989. Kaik 9,752 ristitud elihe Piltsamaan volostiš vl 2019.

Rahvahad (lidnalaižed, vl 2011): estilaižed — 98,0 %, toižed rahvahad — 2,0 %.

Openduz

Lapsiden opendusen aluzkundad oma kaks' päivkodid, gimnazii, muzikškol, čomamahtoine škol.

Professionaližen opendusen aluzkundad ratas lähembaižiš lidnoiš.

Galerei

• 
  Lidnan administracijan pert' (2013)
• 
  Lidnuz da pühäpert', vn 2007 nägu
• 
  Söndtavaroiden tegim vl 2015
• 
  Lidnan gimnazii (olend vn 2013 semendkus)
• 
  Kanzaline keskuz (eloku 2019)

Irdkosketused

• Piltsamaan volostin ohjastusen oficialine sait (poltsamaa.ee). (est.)
• Lidnan da volostin turizman sait (visitpoltsamaa.com). (est.) (angl.) (suom.)
• Verkkamer Piltsamaan lidnusen päl, täuz' nägu estonia360.ee-saital.