Skorpionar er små dyr med store klør framme ved hovudet. Kroppen er avlang, og dei har ein giftbrodd på halen. Skorpionar tilhøyrer edderkoppdyra.
Det er ca. 1500 artar skorpionar i verda. Dei fleste lever i tropane, men det finst skorpionar så langt nord som Storbritannia. Det finst ikkje skorpionar i Noreg.
Mosskorpioner (edderkoppdyr) og vasskorpionar (teger) liknar ekte skorpionar, men dei har ikkje hale med brodd.
Skorpionar har blank skjeletthud, med tydelege ledd og åtte bein. Dei fleste er svarte eller brune i dagslys, men om ein lyser på dei i mørket, reflekterer dei ultrafiolett lys.
Skorpionar held bakkroppen med brodd i ein boge over kroppen. Framme ved hovudet sit det store klør med klosakser som dei brukar til å halde fast byttedyr med. Dei har to til fem par med små punktauge på sida av hovudet. Skorpionar er 1,3–20 centimeter lange.
Skorpionar er rovdyr som er mest aktive om natta. Om dagen gøymer dei seg ofte under steinar og i mørke holrom. Skorpionar jaktar på insekt og andre små dyr. Dei brukar gifta si både til angrep og forsvar. Nokre artar brukar klosaksene til å avlive byttet. Gifta inneheld stoff (enzym) som gjer maten meir flytande.
Mange skorpionar trivst tett på menneske og kan kome inn i hus og andre bygningar. Det er omtrent 30 artar som er dødelege for menneske.
Skorpionar blir vanlegvis tre til fem år gamle. Dei utviklar seg sakte og har lange liv samanlikna med insekt og edderkoppar. Nokre artar kan bli 10–15 år gamle.
Når ein hann vil pare seg, lagar han ein pakke med sædceller som han legg på bakken. For å lokke hoa, bruker han luktstoff. Når ei hoe dukkar opp, «leier» han henne med klørne over denne pakken. Etter at hoa er befrukta, må hannen flykte for at ho ikkje skal ete han.
Skorpionar føder levande ungar. Dei legg ikkje egg slik mange edderkoppdyr og insekt gjer. Egga blir klekte inne i mora. Ungane liknar dei vaksne når dei kjem ut, men er små og lyse. Dei klatrar opp på ryggen til mora og blir der til dei har skifta hud for fyrste gong.
Alle skorpionar må skifte skjeletthud for å vekse.
Skorpionar er gamle dyr som fanst for 400 millionar år sidan. Dei tidlege skorpionane levde antakeleg i vatn.
