Scratch (musika)

Artikulu hau musika-teknikari buruzkoa da; beste esanahietarako, ikus «Scratch».

Scratch edo scratching disc-jockey edo turntablistek erabiltzen duten teknika bat da, binilozko disko bat disko-jogailu baten gainean aurrerantz eta atzerantz mugituz soinu bereizgarriak sortzeko erabiltzen dena. Aldi berean, nahaste-mahai batean crossfader delakoa manipulatzen dute. Scratchinga normalean hip hop musikarekin lotzen bada ere, 1990eko hamarkadatik teknika hau beste estilo batzuetan ere erabili izan da, hala nola pop, house eta nu metal estiloetan. Hip hop kulturaren barruan, scratchinga DJ baten trebetasun-neurritzat hartzen da, eta horregatik scratch lehiaketa ugari daude.

Historia

New Yorkeko lehen hip hop DJek garatu zuten scratchinga, hala nola DJ Grand Wizard Theodorek eta Grandmaster Flashek. DJ Kool Herc jamaikar jatorriko DJak ere eragina izan zuen scratchingaren lehen garapenean. Kool Hercek break-beat bidez musika egiteko modua garatu zuen, funk abestien breakak erabiliz.^[1]

Hip hopetik kanpo, beste artista batzuek esperimentatu zuten disko bat eskuz manipulatu eta soinuak sortzeko, William S. Burroughsek 1950eko hamarkadako "Sound Piece" grabazioan bezala. Christian Marclay izan zen scratch-a hip hopetik kanpo soinu-collageak sortzeko erabili zuen lehen musikarietako bat.^[2]