Zamdane

den
Reizh pe jener	paotr
Bro ar geodedouriezh	Frañs
Anv-bihan	Ayoub
Deiziad ganedigezh	1997
Lec'h ganedigezh	Marrakech
Micher	rapper

Zamdane, a zo Ayoub Zaidane e anv gwir, zo ur raper ha kaner genidik eus Maroko. Ganet eo d’ar 25 a viz Gwengolo 1997 e Marrakech.

Buhez

Ganet ha maget eo bet Zamdane e Marrakech, ha resisoc’h e karter Bab Doukkala, hag a vez meneget alies en e ganaouennoù. Komz a rae galleg gant e dad e-pad e yaouankiz, ha selaou a rae bamet Charles Aznavour pe c’hoazh Dalida, hag a zo evitañ arzourien veur ar sonerezh gall.

Ne oa nemet 17 vloaz pa erruas e Bro-C'hall e miz Gouere 2015 evit kenderc’hel gant e studioù ekonomiezh e-kichen Marseille. A-drugarez d'e vignoned nevez e voe dizoloet ar sonerezh rap gantañ, ha buan en doe c’hoant d’en ober ivez : e miz Here 2015 e lakaas e anv evit kemer perzh e « open mics », e-lec’h e reas anaoudegezh gant kalz a dud pouezus e metoù ar rap.

E 2017 e voe embannet un nebeud kanaouennoù gantañ, da c’houde e kemeras perzh en un nebeud freestyloù aozet gant mediaoù rap, evel ar « Règlement Freestyle » pe « Grünt ». Etre 2018 ha 2020 e voa embannet meur a raktres gantañ, dreist-holl Affamé – Saison 1 e 2018. E 2021 e voe embannet gant Zamdane ar peurrest eus ar raktres-se, Affamé – Saison 2. Gant ar raktres-mañ e voe ledanaet e selaouerien hag e vrud, dreist-holl a-drugarez d’ur feat gant Soso Maness, ur raper eus Marseille, hag a bedas anezhañ en abadenn Planète Rap un nebeud mizioù goude.

E 2022 e voe embannet gantañ e album kentañ, anvet Couleurs de ma peine. Ar featurings a zo war an album (gant Dinos, Soso Maness ha Jazzy Bazz) a sikouras anezhañ da vezañ anavezetoc'h-anavezetañ gant ar selaouerien, ha renket e voe ar bladenn e 5vet plas top album Bro-C’hall. Ur bloaz goude, e 2023 e voe embannet gant Zamdane Affamé – Saison 3.

Met e album diwezhañ, Solsad, embannet e 2024, eo an hini a lakaas anezhañ da vezañ anavezet-tre, a-drugarez da galz a featurings, da skouer gant Tif, Zaho, Pomme, Josman, So La Lune, Kekra, Niska ha Sofiane Pamart. Renket eo bet an album e 3de plas an top album, ha mont a ra Zamdane d’ober un droiad vras eus ar festivalioù hag ar salioù sonadegoù.

Ouzhpenn e entan evit ar sonerezh eo engouestlet Zamdane ivez er politikerezh : aozet en deus meur a sonadeg a garite anvet Zamdane & ses amis evit souten ar gevredigezh SOS Méditerranée, en ur bediñ kalz a ganerien rap da gemer perzh. Kemeret en deus perzh ivez en ur sonadeg evit souten Palestina aozet gant Tif, anvet Solidarité Palestine : it’s not about us.